სად შევიძინოთ ახალი აიფონები, მნიშვნელოვანი გარდატეხა ეფლის დიზაინში, ტექნიკური მახასიათებლები, სმარტფონების პლიუსები და მინუსები

Apple-ი აგრძელებს საზოგადოების გაოცებას და კვლავ ახალ სტანდარტებს აწესებს. რას უნდა ველოდოთ ახალი თაობის აიფონებისგან და სად შეიძლება ვიყიდოთ ისინი პირველებმა?

დღესდღეობით სმარტფონების ინდუსტრიაში საკმაოდ მაღალი კონკურენციაა, თანამედროვე სენსორებითა და მოწყობილობებით აღჭურვილი ტელეფონის შექმნა უკვე დიდ პრობლემას აღარ წარმოადგენს, შესაბამისად მწარმოებლებს ახალი ფლაგმანების გამოშვებისას სულ უფრო და უფრო უჭირთ აჟიოტაჟის გამოწვევა და მომხმარებელთა გაოცება. თუმცა ეს Apple-ს ნამდვილად არ ეხება.

ამერიკული კომპანია გაყიდვების დაწყების წინ უზარმაზარი რიგების შექმნას ყოველ წელიწადს ახერხებს. სულ ახლახანს ეფლმა საზოგადოებას 3 ახალი სმარტფონი წარუდგინა – iPhone XS, iPhone XS Max და iPhone XR.

Ebg.ge-ზე მათი შეძენის შემთხვევაში თქვენ საშუალება გექნებათ ისარგებლოთ დაბალპროცენტიანი საგარანტიო პირობებითა და საიმედო გარაანტიით. აღნიშნული მოდელების ნახვა შეგიძლიათ შემდეგ ბმულებზე:

iPhone XS

iPhone XS Max

iPhone XR

სიმართლე, რომ ვთქვათ ახალ მოდელებს 2017 წელს გამოსული iPhone X-სგან განსხვავებით რაიმე განსაკუთრებული განახლება არ მიუღიათ. ძირითადი ცვლილება შიდა ტექნიკურ ნაწილს შეეხო. საინტერესოა აგრეთვე „Max“ ვერსიის დამატება, მისი ეკრანის დიაგონალი არც მეტი არც ნაკლები 6.5 დიუმს შეადგენს. რაც შეეხება iPhone XR-ს, იგი გასულ წელს გამოსული iPhone 8-ის უჩვეულო იდეოლოგიურ გამგრძელებლად გვევლინება და ახალი თაობის აიფონების ყველაზე ხელმისაწვდომ მოდელს წარმოადგენს (მისი საწყისი ფასი $900-ია).

ახალი სტანდარტი

2018 წელი ეფლის სმარტფონებში ერთგვარი გარდამტეხი პერიოდია. ამერიკულმა კომპანიამ სამივე ახალი სმარტფონი მინიმალური ჩარჩოების მქონე თანამედროვე ეკრანებით აღჭურვა და ტრადიციული დიზაინსა და ყველსასათვის კარგად ნაცნობ home ღილაკზე, რომელსაც წლების განმავლობაში აქტიურად იყენებდა, სრულიად უარი თქვა.

iPhone XS და iPhone XS Max გაიყიდება ტრადიციულად სამ ფერში – კოსმოსური ნაცრისფერი, ოქროსფერი და ვერცხლისფერი. მათი ფასი ვერსიებიდან გამომდინარე იქნება $999-1349 და $1099-1449. რაც შეეხება iPhone XR-ს იგი გაყიდვაში გვიან ჩაეშვება, როგორც შედარებით ბიუჯეტური ვარიანტი. იგი ხელმისაწვდომი იქნება 5 ფერში – შავი, თეთრი, წითელი, ყვითელი და ლურჯი, საწყისი ღირებულებით $849.

დიზაინი და გამოყენების სიმარტივე

გარეგნულად iPhone XS მისი წინამორბედისგან (iPhone X) სრულიად არ განსხვავდება. კორპუსი ისევ შუშითაა დაფარული, რომელიც პოლირებულ ფოლადის ჩარჩოში ზის. ზომებიც იდენტური დარჩა – 143.6 x 70.9 x 7.7. სხვაობაა მხოლოდ წონაში (XS 3 გრ-ით მძიმეა – 177 გრ). თუმცა მინიმალური ცვლილებები მაინც მოხდა – ძირითადი კამერის ბლოკი ძალიან მცირედით გაფართოვდა, აგრეთვე კორპუსზე დაემატა ანტენების რამოდენიმე ხაზი, რამაც ქვედა დინამიკის სიმეტრიულობა ცოტა შეცვალა (პერფექციონისტებს შესაძლოა ეს იდეა არ მოეწონოთ).

iPhone XS Max – პირველი აიფონი გახლავთ, რომლის ეკრანის დიაგონალი 6.5 დიუმს შეადგენს, ხოლო გაბარიტებით ძალიან ახლოსაა iPhone 8 Plus-თან 157.5 x 77.4 x 7.7, წონით 208 გრ. შესაძლოა ერთი შეხედვით ეკრანის ზომამ დაგვაბნიოს და გვაფიქრებინოს, რომ სმარტფონი არაპრაქტიკული იქნება, თუმცა ეს ასე ნამდვილად არ არის. არ დაგავიწყდეთ, რომ მისი ზედაპირის 84.4% ეკრანს უჭირავს და ჩარჩოები პრაქტიკულად არ გააჩნია.

რაც შეეხება iPhone XR-ს, როგორც ზემოთ ავღნიშნე, iPhone 8-ს იდეოლოგიურ გამგრძელებლად მოიაზრება, კონფერენციაზე მისი წარდგენა სწორედ ასე მოხდა. შესაბამისად ერთის მხრივ ინარჩუნებს მის დიზაინს და მეორე მხრივ ეკრანზე ჩარჩოების ჩამოშორების შედეგად, X-სერიის სტილსაც აგრძელებს. iPhone XR დიზაინი ძველისა და ახლის ერთგვარ შერწყმას წარმოადგენს.

ეკრანი

გასული წლისგან განსხვავებით ეკრანთან მიმართებაში რაიმე კარდინალური არ მომხდარა, თუ არ ჩავთვლით „მეორე ზომის“ დამატებას. ფლაგმანები XS და XS Max წარმოდგენილია 5.8 და 6.5 დიუმიანი ეკრანებით, შესაბამისად 2436x1125 და 2688x1242 გაფართოვებით. ორივეს შემთხვევაში პიქსელების სიმჭიდროვე 458 ppi-ს უდრის. დამზადების ტექნოლოგიად კვლავ OLED მატრიცა მოგვევლინა, დასახელება Super Retina HD-იც არ შეცვლილა.

iPhone XR-ის ეკრანის ზომაც მის წინამორბედთან შედარებით გაიზარდა 6.1 დიუმამდე, თუმცა რეზოლუცია საშუალო დონეზე დარჩა - 1792x828, სიმჭიდროვით 326 ppi. რაც შეეხება ეკრანის ტიპს, ასევე შენარჩუნებულ იქნა IPS LCD მატრიცა, რომელსაც ეფლმა ახალი სახელი - Liquid Retina მოუფიქრა.

ხმა

გასულ წელს აიფონებში ყველაზე სასიამოვნო დინამიკი 8 Plus-ს ჰქონდა. ამ შემთხვევაში სამივე მოდელში აღნიშნული პარამეტრი მნიშვნელოვნად გაუმჯობესებულია, ხმა გაცილებით მაღალზე ისმის, თუმცა ვერ ვიტყვით, რომ ხარისხის მხრივ რაიმე კარდინალური ცვლილებაა.

ყურსასმენებთან მიმართებაში ყველაფერი ისევ რთულად არის. თუ წინა წელს მხოლოდ ყურსასმენების ტრადიციული 3.5 მმ-იანი პორტი ამოიღეს და სანაცვლოდ კომპლექტში გადამყვანი მოაყოლეს, წელს გადამყვანიც ამოღებულია. ამერიკული კომპანია სულ უფრო ცდილობს მომხმარებელი უსადენო ბლუთუზე ყურსასმენებზე გადაიყვანოს.

პროდუქტიულობა და პროგრამული უზრუნველყოფა

თუ აიფონებში დიზაინის მხრივ ცვლილებები ძალიან რთული შესამჩნევია. პროცესორის სიმძლავრე და პროდუქტიულობა ყოველწლიურად სტაბილურად იზრდება. A11 Bionic ჩიპი A12 Bionic-მა ჩაანაცვლა. 7 ნანომეტრულ პროცესორზე თავი მოიყარა ორმა მაღალპროდუქტიულმა და ოთხმა ეკონომიურმა ბირთვმა. მწარმოებლის თქმით ამან გასული წლის მაჩვენებელი 15%-ით გააუმჯობესა, ხოლო ენერგომოხმარება ორჯერ უფრო შეამცირა. არ უნდა დავივიწყოთ ოპერატიული მეხსიერების 4GB-მდე გაზრდაც (iPhone XR 3GB-ით იქნება წარმოდგენილი).

მნიშვნელოვნად გაიზარდა ინტერფეისისა და აპლიკაციების მუშაობის ხარისხიც, რაც დიდ წილად iOS 12-ის დამსახურებაცაა. მისი შექმნისას Apple-მა ყურადღება გაამახვილა არა ფუნქციონალის გაფართოვებაზე, არამედ არსებული ვერსიის დახვეწაზე და დამუშავებაზე.

კამერა

კამერა ერთ-ერთია იმ ფუნქციათა ჩამონათვალიდან, სადაც გასული წლისგან განსხვავებით მნიშვნელოვანი პროგრესი არ შეინიშნება. სამივე მოდელი აღჭუვილია 12MP კამერით (iPhone XS/XS Max-ს ორ-ორი ძირითადი კამერა აქვთ, ხოლო iPhone XR-ს ერთი), f/1.8 და f/2.4 დიაფრაგმით და ოპტიკური სტაბილიზაციით, რაც იმას ნიშნავს, რომ კამერები ძველებურად იღებს საკმაოდ ხარისხიან და ნათელ ფოტოებს, როგორც ღამით ისე დღისით.

ჩვეულებრივი ტელეფონის შემთხვევაში, როდესაც სურათის გადაღებას ვცდილობთ, რამოდენიმე კადრის გაკეთება გვიწევს და შემდეგ ვარჩევთ მათგან საუკეთესოს. აღნიშნულ მოდელებში ჩამონტაჟებულია Smart HDR ფუნქცია, რომლის საშუალებითაც, გადღაბნილი და არეული სურათები უკვე წარსულს ჩაბარდა, ახლა თქვენს მიერ გადაღებული ყოველი ფოტო მაღალი ხარისხის იქნება ჩრდილებისა და ზედმეტად განათებული ადგილების გარეშე.

არ შეცლილა სელფის კამერის მაჩვენებელიც - 7MP-ზე დარჩა. აგრეთვე შეუფერხებლად მუშაობს და არანაირი ხარვეზი არ შეინიშნება სახის ამომცნობ სკანერშიც.

აქვე უნდა აღინიშნოს, რომ სამივე მოდელს შეუძლია 4K ვიდეოს გადაღება 60 FPS-ით და შენელებული ვიდეოს ჩაწერა Full HD 240 FPS სიჩქარით. პრეზენტაციისას განსაკუთრებული აქცენტი გაკეთდა ვიდეოს გადაღებისას სტერეოხმის ჩაწერის შესაძლებლობაზე.

ავტონომიურობა

ცნობილი ფაქტია, რომ აიფონებს ყოველთვის მცირე მოცულობის მქონე ელემენტები აქვთ, თუმცა საკუთარი პროცესორებისა და ოპტიმიზირებული პროგრამული უზრუნველყოფის ხარჯზე საკმაოდ დიდ ხანს შეუძლიათ მუშაობა. როგორც პირველი მომხმარებლების კომენტარებიდან ირკვევა, სამივე აპარატის მუშაობის დრო, ყოველდღიური მოხმარების პირობებში 1-1.5 დღემდე მერყეობს, რაც წინა აიფონებთან მიმართებაში მნიშვნელოვანი პროგრესია.

მაგ. Apple-ს მარკეტინგის მენეჯერმა ფილ შილერმა iPhone XR-ის პრეზენტაციისას ელემენტთან დაკავშირებით განაცხადა, რომ მისი ავტონომიურობა iPhone 8 Plus-თან შედარებით 1.5 საათით მეტია.

დასკვნის სახით შეიძლება ითქვას, რომ Apple წარმატებით აგრძელებს საკუთარი სმარტფონების გამოშვებას და როგორც ყოველთვის ინარჩუნებს ხარისხსა და სტაბილურობას. წლევანდელ მთავარ სიახლეს წარმოადგენს iPhone XS Max, რომელიც ზომაში თითქმის iPhone 8 Plus-ის ტოლია თუმცა 6.5 დიუმიანი ეკრანი აქვს. ეს ალბათ ყველზე მეტად მათ მოეწონებათ ვისაც ამ ბრენდის ტელეფონის ყიდვა სურდათ მაგრამ, ეკრანების მცირე დიაგონალი აფერხებდათ.

აგრეთვე კიდევ ერთი აღსანიშნავი სიახლეა, ორ სიმიანი მოდელების გამოშვებაც, რომლებიც ჯერ-ჯერობით მხოლოდ ჩინური ბაზრისთვის იქნება გათვლილი.

ერთი შეხედვით ამერიკული კომპანიისთვის უჩვეულო გადაწყვეტილებაა წყლისგან და მტვრისგან დაცვის დონის მომატებაც IP68-მდე, თუ აქამდე აიფონის პატრონებს დასველების ძალიან ეშინოდათ და ეს არაერთხელ გამხდარა ინტერნეტში მათი გაშარჟების საგანი, ახლა სიტუაცია რადიკალურად შეცვლილია

რაც შეეხება მინუსებს, გამოვყოფდი 3.5 მმ-იანი ყურსასმენის პორტის გაუქმებას აგრეთვე დასანანია კომპლექტაციაში ყურსასმენების გადამყვანისა და სწრაფი დამტენის არ არსებობაც. მოგეხსენებათ სმარტფონს ჩვეულებრივი დამტენი მოყვება, რომელიც ელემენტის სრულად შევსებას 3.5 საათს ანდომებს. ვფიქრობ ასეთი დონის კომპანია ასეთ დეტალებზე ეკონომიას არ უნდა აკეთებდეს.

რას ფიქრობთ, მოგწონთ ახალი აიფონები?! უახლოეს მომავალში მის შეძენას ხომ არ ფიქრობთ? ყველაზე მეტად მის რომელ ფუნქციონალს გამოყოფდით? გთხოვთ კომენტარების ველში გაგვიზიაროთ თქვენი შთაბეჭდილებები ეფლის ახალ პროდუქტებთან დაკავშირებით!