მათი გალამაზება თავადაც შეგვიძლია და ეს მხოლოდ ფერადი ლაქის გადასმით არ შემოიფარგლება.

ფრჩხილები ადამიანის სხეულის განუყრელი ნაწილია, რომელიც პირველყოფილებს საარსებოდ სჭირდებოდათ. დღესდღეობით კი მათი მნიშვნელობა დაიკარგა და ფრჩხილები უბრალოდ, ქალის სილამაზის ერთ-ერთ ატრიბუტად იქცა. სამწუხაროდ, ეს სილამაზეც ძვირი გვიჯდება - მანიკურის გასაკეთებლად სალონში დიდი თანხის გადახდა გვიწევს. ამიტომ უნდა გითხრათ, რომ მათი გალამაზება თავადაც შეგვიძლია და ეს მხოლოდ ფერადი ლაქის გადასმით არ შემოიფარგლება. შემოგთავაზებთ იდეებს ფრჩხილების გასალამაზებლად, რომელთა გამოყენებაც ადვილი იქნება, ზედმეტ დროსაც არ წაგართმევთ და დიდ ხანსაც გაძლებს. ამასთანავე, დაგისახელებთ ნივთებს, რომლებიც დაგვეხმარება, რომ ფრჩხილები მიმზიდველი და ესთეტიკურად კარგი შესახედი გავხადოთ.

1.  ქლიბის ქონა აუცილებელია, რადგან ფრჩხილისთვის სასურველი ფორმის მიცემაში და მათი სწორად გაზრდის რეგულირებაში სწორედ ის გვეხმარება. მოგეხსენებათ, ფრჩხილები ყოველთვის იზრდება, თუმცა ხშირად არ მოგვწონს, თუ როგორ გამოიყურება და ამის გამო ვიჭრით. ეს თავიდან რომ ავიცილოთ და თქვენც ბედნიერი იყოთ ფრჩხილების ფორმით, რამდენიმე ვარიანტს გთავაზობთ:

2. ნუნების მაკრატელი; ფრჩხილთან ერთად ნუნებიც იზრდება და ცუდი შესახედავი ხდება. ამიტომ მაკრატლის საშუალებით უნდა მოვიცილოთ ზედმეტი კანი, რომ ლაქის წასმაში ხელი არ შეგვეშალოს და ფრჩხილიც უფრო გამოკვეთილად გამოჩნდეს. აქვე გეტყვით იმასაც, რომ თუ ფრჩხილების დაჭრას გადაწყვეტთ, ჯობია ეს მაკრატლით გააკეთოთ და არა ე.წ „კუსოჩკით“, რომელიც ძალიან აწვება ფრჩხილს, აზიანებს, ტეხავს და თქვენთვის სასურველ ზომაზე არ ჭრის.

3. აცეტონი და ბამბა აუცილებელი ნივთებია, რადგან უშეცდომო არავინ არის და ლაქის წასმისას შეიძლება შეცდომა დავუშვათ, მათი გამოსწორებისთვის კი ყოველთვის მზად უნდა ვიყოთ.

4. სასურველია ასევე მოსაშორებელი სითხის (Peel off) ქონა, რომელსაც თითებზე წაისვამთ და მათზე მოხვედრილი ლაქის დარჩენის საშიშროება აღარ გექნებათ, რადგან აცეტონის არქონის შემთხვევაში ლაქს, როგორც სტიკერს, ისე მარტივად აიძრობთ კანიდან.

5. და ყველაზე მთავარი - დაგვჭირდება ფერადი ლაქები.

ახლა კი გადავიდეთ ფრჩხილის გასალამაზებელ იდეებზე;

ყველაზე ადვილი და მოსახერხებელი არის გრადიენტის შექმნა. ესაა თქვენი სასურველი ფერთა შეხამება, რომლებიც ერთმანეთს პალიტრის მსგავსად ერწყმიან და მოსაწყენ ერთი ფერის მაგიერ ფერთა საოცარ ჰარმონიას ქმნიან, ისეთს, როგორიც ზევით, სურათზეა ნაჩვენები. ამის გასაკეთებლად საჭიროა, ჯერ თეთრი ლაქი წავისვათ ფრჩხილებზე, რადგან თეთრზე ფერები უკეთ გამოჩნდება; შემდეგ ავიღოთ ღრუბელი და მასზე სასურველი ფერები ისე წავუსვათ, რომ ერთმანეთზე გადადიოდნენ და შემდგომ, სანამ მანიკური ღრუბელზე გაშრება, იგი ფრჩხილზე ღრუბლის სწრაფი ზევით და ქვევით მოძრაობით გადავიტანოთ (დიდი ალბათობაა იმისა, რომ ლაქმა მთელ თითი მოსვაროს და სწორედ ამიტომ, სასურველია ზევით ნახსენები კანიდან მოსაშორებელი სითხის ქონა). როდესაც ფერთა შეხამებით ნასიამოვნები დარჩებით, ზევიდან გადაუსვით ან ზედაპირის ლაქი, რომელიც ჩვეულებრივ ლაქთან შედარებით უფრო თხელია და სწრაფად შრება, ან - უფერული ლაქი.

ალბათ, ხშირად გინახავთ ვიდეოები, სადაც ლაქებს წყალში ასხამენ და შემდეგ ისინი ნივთებზე გადააქვთ. ამის გაკეთება ფრჩხილებზეც შესაძლოა და ძალიან ადვილია. ოთახის ტემპერატურის წყალში ჩააწვეთებთ სასურველ ლაქს და პატარა ჩხირით ეცდებით რაიმე ფორმის გამოყვანას, ბოლოს კი ფრჩხილს წყალში ჩადებთ და თქვენი შექმნილი დიზაინი ფრჩხილზე გადავა.

ყველაზე მრავალფეროვანი და იდეებით სავსე შტამპებია. შტამპები სპეციალურად ფრცხილებისთვის არის შექმნილი, მათზე უამრავი ნახატია და მათი გადატანა არც ძალიან რთულია. ფრჩხილზე ჯერ უნდა წაისვათ სასურველი ფერის ლაქი, შემდგომ შტამპების ზედაპირზე ლაქს დააწვეთებთ, საფხეკის მაგვარი ნივთით ლაქს მთელ შტამპზე თანაბრად გაანაწილებთ და გამოიყენებთ საშტამპო სილიკონს, რომელსაც ლაქწასმულ დიზაინებს გადაატარებთ. დიზაინი უკვე სილიკონზე იქნება და მას ფრჩხილზე გადაიტარებთ ნახატის გადასატანად. ბოლოს კი ფრჩხილებს ზევიდან უფერო ლაქს გადაუსვამთ.

მსგავსია ასევე ფრჩხილებზე დასაკრობი სტიკერები, რომლებიც ზევიდან ლაქით უნდა დავფაროთ და გაშრობამდე უნდა ავიცალოთ სტიკერები, მათ ადგილას კი დიზაინი დარჩება.

თუ სასურველ ნახატს ვერ ნახავთ ან უბრალოდ ისურვებთ, რომ დიზაინი თვითონ შექმნათ, ამაში საღებავები და ბრჭყვიალები დაგეხმარებათ. ამისთვისაც, რა თქმა უნდა, თავიდან ფრჩხილებზე ლაქი უნდა წაისვათ. გამშრალ ლაქზე ნახატის შექმნას წვრილი ფუნჯებით შეძლებთ, სველ ლაქზე კი სხვადასვა ფორმის ბრჭყვიალას განათავსებთ და ისე გააშრობთ. კითხვა გაგიჩნდებათ, სახატავად ლაქების გამოყენება რატომ არ შეიძლება -  ეს შეიძლება, მაგრამ მოსახერხებელი არ არის. ლაქით ხატვა ძნელია, გაშრობას დიდი დრო მიაქვს და რომ შეგეშალოთ, ლაქის მოშორება მთლიანად მოგიწევთ. საღებავი კი მალევე შრება და შეცდომის დაშვების შემთხვევაში ჩხირით მათი მოფხეკვა ან სველი სალფეთკით მოშორება შეიძლება, რაც პირველანდელ წასმულ ლაქს არ დააზიანებს.

იმედია ბევრი ახალი რამ გაიგეთ, მოგინდათ ცდა და ექსპერიმენტების ჩატარება თქვენს ფრჩხილებზე. მე ზემოთ ხსენებულ უმეტეს ნაწილად ვიყენებ და კმაყოფილი ვარ. გთხოვთ, გაგვიზიარეთ თქვენი შეხედულებები .