სათვალე - ისეთი აქსესუარია, რომელიც წელიწადის დროის მიუხედავად ყოველთვის აქტუალურია და მე პირადად შემიძლია ბოლო თეთრები გადავიხადო ჩემთვის ერთ-ერთ ყველაზე საყვარელ ნივთში...

სათვალე - ისეთი აქსესუარია, რომელიც წელიწადის დროის მიუხედავად ყოველთვის აქტუალურია და მე პირადად შემიძლია ბოლო თეთრები გადავიხადო  ჩემთვის ერთ-ერთ ყველაზე საყვარელ ნივთში...

სათვალის შეძენისას ყოველთვის დიდი დილემის წინაშე ვდგები, რადგან სურვილი მიჩნდება უკლებლივ ყველა მათგანი შევიძინო. იქედან გამომდინარე, რომ ამას ვერ მოვახერხებ, იწყება ყველაზე რთული მომენტი - სათითაოდ ვირგებ სახეზე და ჩემზე მეტად დაღლილ კონსულტანს მორიგ შეკითხვას ვუსვამ: „ეს ჯობია არა?“, თუ პასუხი დადებითია, მერთვება წინააღმდეგობრივი განცდა და ვუბრუნდები ჯერ მანამდე მორგებულ მოდელს, შემდეგ ისევ ბოლოს შერჩეულს, შემდეგ სხვას ვიღებ და ასე... ბოლოს, როგორღაც მივდივარ ერთ-ერთი მათგანის შერჩევა-შეძენის გადაწყვეტილებამდე, თუმცა სასაცილო ისაა, რომ ზუსტად ვიცი რა ზომის, ფორმისა და შუშის როგორი დაფერვის ტიპის სათვალე მიხდება, შესაბამისად, საბოლოო არჩევანსაც ამის მიხედვით ვაკეთებ, რაც მეც მაბედნიერებს და დაღლილ კონსულტანტსაც. ეს მოკლე ლირიკული გადახვევა, რაც შეეხება 2018 წლის გაზაფხული-ზაფხულის სეზონს, მინდა გითხრათ, რომ სხვადასხვა წყაროებში წაკითხული „Fashion news“-ებით როგორც ირკვევა, წელს განსაკუთრებით ტრენდულია მზის სათვალეების ცხრა ტიპის მოდელი, რომელთა შესახებ უფრო ვრცლად ბლოგში წაიკითხავთ, სადაც მოდური და აქტუალური აქსესუარის სწორად შერჩევისთვის საინტერესო რჩევებსაც ნახავთ იმის შესახებ, თუ როგორ უნდა შეარჩიოთ ტრენდული სათვალე თქვენი სახის ფორმის შესაბამისად.

მაშ ასე, არ ჩარმორჩეთ მოდას! შეარჩიეთ ტრენდული სათვალეების მოდელებიდან თქვენთვის ყველაზე შესაფერისი და გაილამაზეთ ცხოვრება!

 სათვალე „cat eyes“

ამ ფორმის სათვალეს თამამად შეიძლება ვუწოდოთ ყველაზე პოპულარული. დიზაინერებმა მიმდინარე წლის გაზაფხული-ზაფხულის სეზონისთვის წარმოადგინეს სხვადასხვა ზომის ჩარჩოს მქონე „cat eyes“ სტილის სათვალეები: დაწყებული აკურატული, ულტრათხელი ფორმებით, დამთავრებული „Oversize“ მოდელებით, რომლებსაც შთამბეჭდავი ლინზები და სქელი ჩარჩო აქვთ.

ასეთი სტილის სათვალეებში განსაკუთრებით აღსანიშნავია ის მოდლები, რომლებსაც აქვთ წამახვილებული ზედა კუთხეები და რომელთა ლინზების ფორმა იმეორებს სათვალის ჩარჩოს ფორმას, რაც გარეგნობას მეტ ინტრიგას მატებს.

ვის მოხუდება ასეთი სტილის სათვალე? - ყველას, გარდა იმ ქალბატონებისა, რომლებსაც აქვთ სამკუთხედის ან ძალიან ფართო ფორმის სახე, რადგან ასეთი ფორმის სათვალეში სახე გროტესკულად გამოჩნდება. თუ ასეთ სათვალეს აირჩევთ, მაშინ მაკიაჟში ყურადღება გაამახვილეთ არა თვალებსა და წარბებზე, არამედ ტუჩებზე. თუ თმა გრძელი გაქვთ, უმჯობესია აიწიოთ ან აიკეცოთ, რათა სათვალის მთავარი დეტალი - მახვილი კუთხეები არ დაფაროს თმით.

ფერადი ჩარჩო

ნაზი-ვარდისფერი, იასამნისფერი, ცისფერი, ძვირფასი ქვების ფერები - ყველა ეს ფერი სათვალის ჩარჩოსთვის ტრენდულია როგორც ღია, ისე მშვიდ ტონალობებში. შუშა შეიძლება იყოს სრულიად შავი ან ტონირებული, გლუვი ან სარკისებური არეკვლით და სრულიად სხვადასხვა ფრომის.

ვის მოხუდება ასეთი სტილის სათვალე? - ქალბატონებს, ვისაც აქვთ სახის გამოკვეთილ ნაკვთები. გამომდინარე იქედან, რომ ასეთი ჩარჩოები საკმაოდ სქელია, გამხდარ სახეს მიანიჭებს მეტ ემოციურობას.

სათვალე ორფეროვანი ჩარჩოთი

თუ მონოქრომული ჩარჩოები არ მოგწონთ, შეგიძლიათ შეარჩიოთ მოდელები ორფეროვანი ჩარჩოთი. ასეთი სტილის სათვალეს შეუძლია გამოაცოცხლოს ნებისმიერი ლუქი. საუკეთესო არჩევანი ამგვარი მოდელების შერჩევისას იქნება თეთრის ან ნახევრადგამჭვირვალე ჩარჩოს კომბინაცია რაიმე ღია ფერთან.

ვის მოუხუდება ასეთი სტილის სათვალე? - ოვალური ლინზები ყველანაირ სახეს უხდება, სწორკუთხოვანი კი მოუხდებოდა ისეთ ქალბატონებს, რომლებსაც ასეთივე ფორმის სახე აქვთ.

ნახევრადგამჭვირვალე ჩარჩო

გაზაფხული-ზაფხულის ტრენდულ კოლექციებში წარმოდგენილია ასევე მზის სათვალეები ნახევრადგამჭვირვალე ჩარჩოებით და ჩარჩოს ფერში ტონირებული შუშებით. თუ ასეთი სტილის სათვალეს შეარჩევთ, ის ნამდვილად მოგცემთ საშუალებას იყოთ მასისგან გამორჩეული და თქვენს ვიზუალს მეტ სიმსუბუქეს შემატებს.

ვის მოხუდება ასეთი სტილის სათვალე? - ვარდისფერი, ცისფერი და იასამნისფერი აქტუალურია ახალგაზრდა გოგონებისთვის. 40 წელს გადაცილებული ქალბატონებისთვის უმჯობესია ძვირფასი ქვების ფერებში დამზადებული ჩარჩოს მქონე სათვალის შერჩევა.

კუს ჯავშნის ფორმის ჩარჩო

ასეთი ჩარჩოს მქონე სათვალე უხდება პრაქტიკულად ყველა ფორმის სახეს და ჯდება ნებისმიერი ლუქის კომბინაციაში, ის ამსუბუქებს სახის ნაკვთებს. 2018 წლის გაზაფხული-ზაფხულის სეზონზე მოდურად ითვლება არასტანდარტული ფორმები: უკვე ზემოთ ნახსენები „cat eyes“ ან ნებისმიერი სხვა, რომლებიც საინტერესოდ გამოიყურება. მნიშვნელოვანი ნიუანსი: კუს ჯავშნის ფორმის სათვალის თხელი და მსუბუქი ვარიანტები მზის სათვალეებში ჯერჯერობით ტრენდული არ არის.

ვის მოხუდება ასეთი სტილის სათვალე? - უფრო ახალგაზრდა გოგონებს. ასაკოვანი ქალბატონებისთვის რეკომენდირებულია მოდელები, რომლებშიც ყვითელი ფერი სჭარბობს ყავისფერს.

დაპრინტული ჩარჩო

აბსტრაქტული ნახატი, გეომეტრიული ფიგურების პრინტი — ვარიანტების მრავალფეროვნება შეზღუდული ნამდვილად არ არის. თუ გიჭირთ არჩევანის გაკეთება, შეგიძლიათ ორიენტირი აიღოთ ისეთ ფერთა გამაზე, როგორიც არის თეთრისა და შავის შეხამება. დაპრინტული ჩარჩოს მქონე სათვალე თქვენს „outfit“-ს სითამამეს და ლირიულობას შემატებს.

ვის მოხუდება ასეთი სტილის სათვალე? - ყველა ქალს, რომელთა ასაკიც 40 წლამდეა. უფროსი ასაკის ქალბატონებისთვის ეს მოდელი რეკომენდირებული არ არის, გამონაკლის შემთხვევაში შეიძლება მოუხდეთ მხოლოდ ფრიკებს.

„Oversize“ ავიატორები

ეს არის ავიატორის სტილის სათვალის მხატვრულად გადამუშავებული მოდელი, რომელიც ძალიან საინტერესოდ გამოიყურება. ასეთი ტიპის ჩარჩოსთვის საინტერესო იქნება როგორც სარკისებური არეკვლის მქონე, ისე ტონირებული ნახევრადგამჭვირვალე მინები. უკვე შეგიძლიათ შეიძინოთ ავიატორები, რომლებსაც აქვთ სრულიად არასტანდარტულად ჩასმული ლინზები, რაც საკმაოდ გამორჩეულ სტილს მიანიჭებს თქვენს ლუქს მთლიანობაში.

ვის მოხუდება ასეთი სტილის სათვალე? - ზემოთხსენებული „ავიატორები“ მოუხდება ყველას, ვისაც მრგვალი სახე აქვს, თუმცა, ავიატორების სტანდარტული ფორმის ჩარჩო ნამდვილად არ უნდა მოირგონ. თუ მინები ტონირებულია, ღია ფერის თმის მქონე გოგონებისთვის სასურველია ყავისფერი პალიტრის ჩარჩოები, მუქი ფერის თმის მქონეთათვის კი მოყვითალო-ყავისფერი.

ჩარჩო ორმაგი „ხიდით“

ტრენდულ სათვალეებს შორის არის სხვადასხვა ფორმის ძალიან თხელი, ჩარჩოზე ორმაგი „ხიდის“ მქონე სათვალეები, თან აღსანიშნავია, რომ სათვალის ბმისთვის განკუთვნილი ამ დეტალის, ე.წ. „ხიდი“-ს ზედა ნაწილი გაცილებით დიდია ქვედა ნაწილთან შედარებით. დახვეწილი ხაზების ასეთი დუეტი და დეტალების შეერთების უჩვეულო მიდგომა ქმნის ზომიერად თავშეკავებულ და ცოტა დამაინტრიგებელ ლუქს.

ვის მოხუდება ასეთი სტილის სათვალე? - გოგონებს და ქალბატონებს, რომლებსაც მოკლე ვარცხნილობა აქვთ, რომლებსაც არ ეშინიათ ექპერიმენტების და განსხვავებული სტილის. თუ ასეთ სათვალეს შეარჩევთ, გაითვალისწინეთ, რომ ლინზების ფორმა არ უნდა იმეორებდეს სახის ფორმას: ანუ მრგვალი სათვალე იგივე ფორმის სახეზე არ უნდა გაიკეთოთ.

ჩარჩო ლოგოტიპით

ლოგომანია ტანსაცმელთან, ჩანთებთან და ფეხსაცმელთან ერთად შეეხო სათვალეებსაც. ყველაზე ცნობილმა ბრენდებმაც კი თავის მომხმარებლებს წარუდგინეს სათვალეები, რომელთა ჩარჩოებზე დატანილია ლოგო ან თავად ჩარჩოს აქვს ლოგოს ფორმა. თუ მთლად ლოგოტიპის ფორმის ჩარჩოს ტარება თქვენთვის მიუღებელია, შეგიძლიათ შეარჩიოთ ისეთი ჩარჩოები, რომლებზეც ბრენდის ლოგო მოკრძალებული ფორმით არის დატანილი.

ვის მოხუდება ასეთი სტილის სათვალე? - ყველას, ვისაც სურს მიყვეს მოდის ბოლო ტენდენციებს. თუმცა ნამდვილად ღირს იმის გათვალისწინება, რომ ეს აქსესუარი სულ რაღაც ერთ-ორ სეზონზე გამოგადგებათ და მსგავსი მოდელების პატენტების შეძენაზე არც კი იფიქროთ.

ასეთია მოდისა და ტრედული აქსესუარების ბოლო ტენდენციები სათვალეებთან მიმართებაში. ეს აქსესუარი წლის ნებისმიერ დროს აქტუალურია და გონივრული იქნება, თუ მისი შერჩევისას მოდის ბოლო ტენდენციებთან ერთად გავითვალისწინებთ იმ რჩევებს, რომლებიც ნამდვილად დაგვეხმარება აქსესუარი მოვირგოთ ჩვენი სახის ფორმის შესაბამისად ისე, რომ მოხდენილადაც გამოვიყურებოდეთ და მოდურადაც.

თქვენთვის არის სათვალე აქტუალური აქსესუარი? ითვალისწინებთ მოდის ბოლო ტენდენციებს? სათვალის შერჩევის რა კრიტერიმები გაქვთ? - საინტერესო იქნება თქვენი აზრის მოსმენა ბლოგის კომენტარებში.