აქციე „ჭკვიან სახლად“ ჩვეულებრივი საცხოვრებელი

ჩვენს ირგვლივ Smart-ტექნოლოგიები ყოველდღიურად ვითარდება და პოპულარული ხდება. რაც უფრო ხშირად ვკითხულობთ „ჭკვიანი“ მოწყობილობების შესახებ, მით უფრო გვიჩნდება სურვილი, რომ ისინი ჩვენს ცხოვრებაში აქტიურად დავნერგოთ და ამით ერთგვარად შევიგრძნოთ ის პროგრესი რომელსაც ბოლო წლებია ტექნოლოგიური სამყარო განიცდის. ამ სტატიაში გაგაცნობთ რამოდენიმე მოწყობილობას, რომლის საშუალებითაც თქვენს საცხოვრებელს გამოაცოცხლებთ და გაცილებით უფრო კომფორტაბელურ „ჭკვიან სახლად“ გადააქცევთ.

გარწმუნებთ, რომ ქვემოთ ჩამოთვლილი სისტემების შეძენა-მონტაჟი არანაირ სირთულეს არ წარმოადგენს და ნებისმიერ ადამიანს შეუძლია მსგავსი „ჭკვიანი“ სისტემებით საკუთარი ბინის ავტომატიზირება.

მეთვალყურეობის „ჭკვიანი“ სისტემა

როცა სახლის ავტომატიზაციაზე ვიწყებთ ფიქრს, ალბათ პირველ რიგში საკუთარი ბინისა და ოჯახის უსაფრთხოების დაცვა გვახსენდება. ალბათ თითოეული ჩვენგანისთვის სასურველია ვიცოდეთ რა ხდება ჩვენს სახლში და მის ირგვლივ მაშინაც კი თუ მისგან შორს ვიმყოფებით.

დღესდღეობით ბაზარზე უამრავი კომპანია არსებობს, რომელიც „ჭკვიანი“ კამერების ფართო არჩევანს გვთავაზობს. მათი ფასი პარამეტრებისა და ხარისხის მიხედვით იცვლება. მაგალითად ყურადღებას გავამახვილებდი iSmart Alarm-ზე, რომელსაც HD რეზულუციასთან ერთად ღამის ხედვის ფუნქციაც გააჩნია. ასევე აქვს USB პორტი და ჩანაწერების შენახვის ფუნქცია. შედარებით უფრო დაბალი ფასის სეგმენტში გირჩევდით შემდეგ მოდელებს: Smart 360 VR, Digoo Baby Monitor, 1080p Security Camera.

კონტროლის „ჭკვიანი“ სისტემა

სახლის სრული უსაფრთხოებისთვის ზოგჯერ მხოლოდ კამერები საკმარისი არ არის. რამოდენიმე „ჭკვიანი“ კამერის დადგმის შემთხვევაშიც კი ბინაში შესაძლოა მაინც დარჩეს „გაუკონტროლებელი“ ზონები. ასეთ შემთხვევაში ფასდაუდებელ დახმარებას გაგვიწევენ სხვადასხვა ტიპის სენსორები, რომელთა ასორტიმენტი ტექნიკის ბაზარზე ასევე საკმაოდ მაღალია.

სენსორების საშუალებით თქვენ შეგიძლიათ მიიღოთ დეტალური ინფორმაცია თქვენი ბინის შესახებ, მაგალითად როდის დაბრუნდა ბავშვი სკოლიდან, გაქვთ თუ არა წყლის გაჟონვა, რა ტემპერატურაა მაცივარში, შეეხო თუ არა ვინმე თქვენს სეიფს და ა.შ. ჩვეულებრივ „ჭკვიანი“ კონტროლის სისტემაში შედის ერთი ჰაბი, რომელიც WiFi-ს საშუალებით აკონტროლებს დანარჩენ სენსორებს და იმართება დისტანციურად, ასევე რამოდენიმე ტიპის სენსორი, კერძოდ აქსელერომეტრი, გიროსკოპი, განათებისა და მიახლოვების. თითოეულ მათგანს სხვადასხვა აქტივობის დაფიქსირება შეუძლია. კონტროლის სისტემების ფასიც მათი ხარისხისა და ბრენდების მიხედვით მერყეობს. გთავაზობთ დეტალურად გაეცნოთ შემდეგ მოდელებს: Xiaomi Mijia, Samsung SmartThings, Xtreme Simple Home, Sonoff.

„ჭკვიანი“ განათება

თანამედროვე Smart-ნათურები განათების რამოდენიმე არჩევანს გვთავაზობენ განსხვავებით ჩვეულებრივი ლამპებისა და ნათურებისგან, რომელთაც განათების მხოლოდ ერთ არჩევანი აქვთ. უახლესი მოდელის ნათურები საშუალებას გვაძლევენ ვარეგულიროთ სიკაშკაშის დონე, განათების ფერი და ა.შ. ამასთან დისტანციურად, სმარტფონის ან კომპიუტერის მეშვეობით.

მაინც რა დადებითი პლიუსები აქვს „ჭკვიან“ განათებას?!

• სახლში თქვენი ყოფნის იმიტაცია თუ გარეთ ხართ (დისტანციურად შეგიძლიათ ჩართვა).

• შუქის ავტომატური ჩართვა როცა ოთახში შედიხართ და გამორთვა როცა გადიხართ.

• მაღვიძარას ფუნქციის შესრულება.

• მაშუქი სიგნალიზაცია მაგალითად შემომავალი ზარის შემთხვევაში.

• ხმით ან სხვადასხვა ჟესტებით მართვის შესაძლებლობა.

ბაზარზე წამყვანი პოზიციები უჭირავს შემდეგ Smart-ნათურებს: Philips Hue, LIFX,  Nanoleaf Bloom.

„ჭკვიანი“ ელექტროგაყვანილობა

თუ სახლიდან გასვლის წინ უთოს გამორთვა დაგავიწყდათ ან რაიმე სხვა მოწყობილობა დაგრჩათ ჩართული „ჭკვიანი“ ელექტროგაყვანილობის არსებობის შემთხვევაში ეს არანაირი პრობლემა არ იქნება. თქვენ თავისუფლად შეძლებთ სახლიდან შორს, დისტანციურ რეჟიმში აკონტროლოთ საკუთარი ბინის ელ-გაყვანილობა და გათიშოთ არასასურველი გაჯეტი.

მაგალითად S20 Sonoff WiFi Power Socket ან Orvibo S20, საკმაოდ მარტივი მოსახმარებია, მხოლოდ აერთებთ სტანდარტულ შტეფსელში და ღილაკზე ერთი თითის დაჭერით ავტომატურად უკავშირებთ ინტერნეტს, შემდეგ კი ანდროიდის ან აიოსის დახმარებით აკონტროლებთ.

გართობის „ჭკვიანი“ ტექნიკა

„ჭკვიანი“ სახლი სრულად ვერ დაკომპლექტდება თუ მასში არ იქნება თანამედროვე აუდიო აღჭურვილობა.

ერთ-ერთი ცნობილი კომპანია, რომელიც მულტირუმ კლასის უკაბელო დინამიკებს აწარმოებს გახლავთ Sonos, ალტერნატივის შემთხვევაში შეგიძლიათ განიხილოთ Denon და LG, ასევე Kohler-ი, რომელიც სააბაზანოში ჩასამონტაჟებელ აუდიო მოწყობილობებსაც გვთავაზობს.

Sonos-ის HiFi Speaker სისტემა საშუალებას გვაძლევს სახლის რომელ წერტილშიც გვინდა მივიღოთ სასურველი მუსიკა. იგი შედგება რამოდენიმე სხვადასხვა ზომისა და ტიპის დინამიკისგან, რომელთა ხმის დარეგულირება და მართვა ხდება სმარტფონის ან პლანშეტის მეშვეობით. საკმარისია მხოლოდ გადმოწეროთ შესაბამისი პროგრამა Sonos Controller და დისტანციურ რეჟიმში გაუშვათ სასურველი მუსიკა უშუალოდ ტელეფონის მეხსიერებიდან ან ისეთი ინტერნეტ-სერვისებიდან, როგორებიც არიან Spotify, Pandoram Deezer ან Rdio.