ბევრი დეტალია რისი გათვალისწინებაც მოგიწევთ, იმისთვის რომ მოგზაურობამ მხოლოდ დადებითი შთაბეჭდილებები დაგიტოვოთ.

აი, დადგა ეს ბედნიერი დღეც! უკვე დაგეგმეთ მოგზაურობა, ბილეთებიც შეიძინეთ და თავგადასავლებისთვის ემზადებით . არ აქვს მნიშვნელობა პირველად მიფრინავთ თუ გამოცდილებით სავსე მოგზაური ხართ, ინფორმაცია, რომელსაც დღეს გაგიზირებთ, აუცილებლად გამოგადგებათ.

დავიწყოთ ჩემოდნის ჩალაგებით - ერთ-ერთი ყველაზე მნიშვნელოვანი საკითხი, რომელიც ზოგიერთისთვის ნამდვილი ხელოვნებაა, ჩემთვის კი მთავარია ყველაფრი ჩავატიო ჩემოდანში, რომელიც ნაყიდი ბარგის ზომებს შეესაბამება.

იმისთვის, რომ ჩემოდანში ყველაფერი ჩამტეოდა, მრავალი ინფორმაცია მოვიძიე, როგორ უნდა დამეკეცა და განმეთავსებინა ტანსაცმელი კომპაქტურად, თუმცა, სივრცე მაინც არასდროს იყო საკმარისი.

ბოლოს მეგობარმა ვაკუუმ სათავსოები მირჩია, ტანსაცმლის მოთავსების შემდეგ, სპეციალური ხელსაწყოთი ზედმეტ ჰაერს ვტუმბავ და ჩემი ნივთების ზომაც მინიმუმ ნახევრდება. ეს იყო ჩემთვის ნამდვილი აღმოჩენა.

ამ მეთოდს ვიყენებ ასევე არასეზონური ტანსაცმლის შესახანად, ამით სათავსოებშიც დიდ ადგილს ვზოგავ.

არსებობს უფრო მარტივი ინსტუქციის მქონე სათავსოები, რომელიც მუშაობს იმავე პრინციპით, მაგრამ არ სჭირდება სპეციალური ხელსაწყო, უბრალოდ უნდა მოათავსოთ ტანსაცმელი შიგნით, შეკრათ და ხელის მარტივი მოძრაობით გამოდევნოთ ჰაერი. შედეგად კი მიიღებთ განახევრებული ზომის ნივთს.

ტანსაცმელს და თეთრულს ყოველთვის ამ მეთოდის გამოყენებით ვალაგებ ჩემოდანში, რაც შეეხება ფეხსაცმელს, იმის გათვალისწინებით რომ ყველაზე დიდ ადგილს იკავებს და წონაც დიდი აქვს, ვცდილობ ერთი ან ორი წყვილი კომფორტული ფეხსაცმელი წავიღო. სათავსოდ სპეციალურ ჩანთებს ვიყენებ.

სამკაულებისთვის ვიყენებ წყალგაუმტარ სათავსოებს. რაც შეეხება თავის მოვლის საშუალებებს, რომელიც არის სითხის შემცველი და მის ხელბარგით წაღებას აქვს შეზღუდვები და წესები, ვათავსებ სპეციალურ სამგზავრო პლასტმასის ბოთლებში.

პასპორტს, ფულს და სხვა საჭირო საბუთებებს ვათავსებ წელის ჩანთაში.

ჩემოდანი ჩალაგებულია და შეგიძლიათ მშვიდად გაემართოთ აეროპორტისკენ. ან რამდენიმე საჭირო აქსესუარი დაამატოთ მას: ჩემოდნის ჩამკეტი, რომელზეც სასურველ კოდს დააყენებთ და ასევე სანიშნი ჩემოდნისთვის, რაც თავიდან აგარიდებთ უსიამოვნებას ბარგის დაკარგვასთან ან სხვის ჩემოდანში არევასთან დაკავშირებით.

ერთადერთი საზრუნავი, რაც დაგრჩენიათ არის კომფორტული მგზავრობა და თქვენი მოგზაურობის დასაწყისი შეგიძლიათ წარმატებულად ჩათვალოთ.

კომფორტული მგზავრობისთვის კი კომფორტი გჭირდებათ, რაც საკმაოდ რთულია თვითმფრინავში, მითუმეტეს, თუ მრავალსაათიანი ფრენა გიწევთ.

ძილი ფრენისას საუკეთესო რამ არის, რასაც გააკეთებთ იმისთვის, რომ დაღლილი არ ჩახვიდეთ დანიშნულების ადგილამდე. პირადად მე, ძალიან მიჭირს თვითმფრინავში დაძინება და ყოველთვის თან დამაქვს გასაბერი სამგზავრო ბალიში, გასაბერი ფეხების დასადები და საძილე ნიღაბი.

ამ ჯადოსნური ნივთების დამსახურებით, ჩემი მოგზაურობა მოულოდნელი სიურპრიზებისგან  არის დაზღვეული. თუმცა, სანამ ამ ცოდნას და გამოცდილებას დავაგროვებდი, ბევრი უსიამოვნო, მაგრამ მაინც სასაცილო ისტორია გადამხდენია.

მეგობრების რჩევით, როდესაც ჩემოდანში ტანსაცმელი არ მეტეოდა, თვითმფრინავში ავედი სამი სვიტერით და ორი ქურთუკით, ასევე უკანა გზაზე წამოვედი ჯიბეებში ჩალაგებული ფეხსაცმელებით.

ჩემოდანი სხვისაში ამერია  და მხოლოდ სასტუმროში მისვლის და გახსნის შემდეგ აღმოვაჩინე. გამიმართლა, რომ პატრონს საკონტაქტო ინფორმაცია ჩემოდნის შიგნითა მხარეს ჰქონდა მითითებული.(აშკარად, ჩემზე დიდი გამოცდილება ჰქონდა) დღეს მეცინება, მაგრამ მაშინ საკმაოდ მწარე გამოცდილება მივიღე. უცხო ქვეყანაში მობილურის დამტენიც არ მქონდა და სრულიად უცნობ ადამიანებს ვთხოვდი დახმარებას ჩემოდნის პატრონის საპოვნელად.

ახლაც კი მრცხვენია, როგორ ჩამეძინა ფრენისას უცნობი ადამიანის მხარზე თავჩამოდებულს, მაგრამ მაშინ სად დავმალულიყავი არ ვიცოდი, როდესაც გამოძინებულმა და ბედნიერმა  აღმოვაჩინე უხერხული თვალები, რომელიც უფრო მეტად უხერხულად მიღიმოდა.

დარწმუნებული ვარ თქვენც გექნებათ მსგავსი საინტერესო ისტორიები. გამიზიარეთ თქვენი გამოცდილება და ასევე როგორ ალაგებთ ნივთებს ან როგორ გაგყავთ თვითმფრინავში დრო.

გისურვებთ ბევრ, შთაბეჭდილებებით აღსავსე მოგზაურობას.