ბევრს ცდილობ, მაგრამ მაინც ვერ უმკლავდები ქაოსს შენს სამზარეულოში? თუ არ გყოფნის სათავსოები ჭურჭლის კოლექციისთვის, უამრავი ტაფისთვის თუ სანელებლების ქილებისთვის, შეიძლება გეგონოს, რომ უბრალოდ შენი სამზარეულოა ძალიან პატარაა. 

ვეცდები გაგიზიარო რამდენიმე ხრიკი და ნივთი, რომლითაც პატარა სამზარეულოსაც ახალ ვიზუალს მისცემ, და გაფართოვების გარეშე გექნება საშუალება, შენს გემოვნებას და მოთხოვნილებებს მოარგო მისი თითოეული კუთხე-კუნჭული. 

1. თაროები საკიდებით

სამზარეულოში აუცილებლად გექნება თავისუფალი კედლის ნაწილი, სადაც ადგილი შეგიძლიათ გამოუძებნოთ პატარა თაროებს საკიდებით. ეს თაროები არ გადატვირთავს სამზარეულოს, და წარმატებით შეგეძლებათ გაათავისუფლოთ ზედაპირიები სხვადასხვა ბოთლებისგან, ყავის თუ ჩაის და ჭიქებისაგან. 

2. ჭურჭლის საშრობი თარო

1 ნახვით შესაყვარებელი და გამოსაწერი თარო, რომელიც შენს თვალწინაა, თავის თავს ყველა სიტყვაზე უკეთ ახასიათებს. მასში ხომ ყველაფერი გათვალისწინებულია, დანების, ჩანგლების, დაფის, ჭიქებისა და თეფშების ჩასადები თაროები, ცალკე პატარა, იზოლირებული სარეცხი საშუალების თაროც კი აქვს მას. ელეგანტურია როგორც ჭურჭლით დატვირთულ, ასევე ცარიელ მდგომარეობაში. სამზარეულოს მოდების ჟურნალში ის ალბათ გარეკანზე მოხვდებოდა და მსოფლიო ტოპ ჭურჭლის ორგანაიზერის სილამაზის კონკურსშიც გაიმარჯვებდა. 

მას მხოლოდ ერთი რამ სჭირდება თქვენგან - ორ განყოფილებიანი ნიჟარა, რომელზეც კომფორტულად მოიკალათებს. 

3. სამზარეულოს მაგნიტი დანებისთვის

თუ შენც გინდა შენი დანები ბზინავდეს და შეინარჩუნოს სიბასრე დიდი დროის განმავლობაში, გირჩევ, აუცილებლად გადაიტანო ისინი სამზარეულოს მაგნიტზე.  სამზარეულოს ტრადიციული, დანების ხის ჩასადებები რთულად იწმინდება და შესაძლოა არასასურველი ნივთიერებები დააგროვოს. "მიმაგნიტებული" დანები კი მუდმივად ჰაერთან კონტაქტშია, მაგნიტი იწმინდება უმარტივესად, და კიდევ ერთი დიდი ნივთისგან გაათავისუფლებს თქვენი სამზარეულოს ზედაპირს.

4. დასაკეცი ურნა

ქაოსის გამომწვევი თუ მზარეულობის პროცესში დაგროვებული ხილის, ბოსტნეულის და სხვა პროდუქტების ნარჩენებია, ამისთვის დასაკეცი ურნა გამოგადგებათ.

ეს ურნა შეგიძლიათ ნებისმიერი კარადის კარს მიამაგროთ, რჩება დაკეცილ მინიმალურ ზომებში როცა მას არ იყენებთ, მზარეულობის პროცესში კი შეგიძლიათ იქ მოათავსოთ, სადაც თქვენს პროდუქტს ჭრით. თითოეული ხახვის ფურცელი თუ კარტოფილის კანი მომენტალურად აღმოჩნდება ურნაში, რომელიც ყველაზე პრაქტიკულ ადგილასაა მოთავსებული და გაამარტივებს შემდგომი დალაგების პროცესსაც.

5.  ისევ საკიდები!

თუ თქვენს გაზქურასთან ახლოს მოიძებნება თავისუფალი სივრცე კედელზე - მოიძებნება მისი ფუნქციური გამოყენებაც.

ამ პატარა, ელეგანტურ საკიდზე შეგიძლიათ მოათავსოთ ყველა აქსესუარი, რომელსაც საჭმლის მომზადების დროს იყენებთ. ასევე შეგიძლიათ რამდენიმე ბლინის, ან საუზმის ტაფა, საზომი ჭიქა ჩამოკიდოთ, ან ნებისმიერი ნივთი თქვენი საჭიროების მიხედვით, და ეს ყველაფერი ხელის გაწვდენაზე იქნება, ზედაპირების გადატვირთვის გარეშე. 

 6. სანელებლების თარო

ფერად-ფერადი სანელებლების ბნელ უჯრებში დამალვა ნამდვილი დანაშაულია, როცა მათ შეუძლიათ გაალამაზონ და გაახალისონ თქვენი სამზარეულოს კედელი ! 

სანელებლების თაროს უკვე დიდი ხანია დავადგი თვალი მეც, და იმედი მაქვს მალე მექნება საშუალება ჩემს ახალ სამზარეულოში ყველაზე გამოსაჩენ ადგილას განვათავსო. სანელებლები და დანები კარგი მზარეულის პირველი მეგობრები არიან, შესაბამისად საპატიო ადგილი კედელზე ნამდვილად ეკუთვნით. 

7. უჯრის ორგანაიზერი

თუ უჯრაშიც ქაოსია, ამასაც მოევლება. ბამბუკის გენიალური, მრავალგანყოფილებიანი სათავსო, რომელიც ზომაშიც რეგულირდება, იდეალურად მოერგება ნებისმიერი ზომის უჯრას და მოაწესრიგებს მას. ბამბუკი ეკოლოგიურად სუფთა პროდუქტია, სასიამოვნო სტუქტურით და ვიზუალით, ბამბუკის გამოყენება სამზარეულოს ნივთებში უფრო და უფრო მოდური ხდება, შესაბამისად არ ინანებ თუ პლასმასის ორგანაიზერის ნაცვლად შეიძენ ამ ბამბუკისგან დამზადებულ ვერსიას. 

8. მაცივრის თარო-ორგანაიზერი.

მაცივარი სამზარეულოს აუცილებელი ატრიბუტი და ნამდვილი განძის სკივრია. ბევრ მზარეულს საკუთარი, განუმეორებელი ტექნიკებიც კი აქვთ შემუშავებული, ინგრედიენტების მაქსიმალურად ანტიქაოსური განლაგებისთვის. 

თუ ასეთ სიზუსტეს არ ეძებ, მაგრამ შენი მაცივარი გაივსო და არ გინდა მდნარი ყველის ძებნა ყველა თაროზე გიწევდეს, ინგედიენტების განსაცალკევებლად გირჩევ თარო-ორგანაიზერების შეძენას. 

ეს თაროები ქვემოდან ემაგრება უკვე არსებულ თაროს, და იმ სივრცის გამოყენების საშუალებას გაძლევს, რომელიც აქამდე თავისუფალი იყო. ჩემი შერჩეული თაროები გამჭირვალეა, რაც დამატებით გაძლევს საშუალებას ზუსტად იცოდე, სად შეინახე შენი ავოკადო და სად უნდა იპოვო დედას გადამალული ხაჭოს ნამცხვრები.

9. ქვაბების და ტაფების ორგანაიზერი.

ეს ნივთი ალბათ ანგელოზებმა გამოიგონეს, ორგანიზების ჩემი სურვილის დასაკმაყოფილებლად. თუ შენც მუდმივად ცდილობ მიუჩინო ადგილი ტაფებს და ქვაბებს, მაგრამ თითქოს ყურსასმენის მავთულებივით ერთმანეთში არეული გხვდება თაროზე, ეს ნიშნავს რომ შენც გჭირდება სამზარეულოს ორგანაიზერი. 

ეს პატარა ჩემი ფავორიტია, შეგიძლია დაარეგულირო თითოეული "სათავსოს" სიმაღლე შენი სურვილის მიხედვით, ნებისმიერი ნივთის ასაღებად არ გიწევს ქაოსი შექმნა და გადმოიღო ჭურჭლის მთელი კოლექცია, დიდი წვეულების შემდეგ კი შეგიძლია ჭურჭლის გასაშრობადაც კი გამოიყენო. 

იმედია, მოგეწონა ჩემი ანტიქაოსური ნივთების სია სამზარეულოსთვის, ვეცდები მომდევნო ბლოგში ის ნივთებიც შემოგთავაზო, რომლებიც ქაოსს ებრძვის მთლიანად სახლში, და ჩვენს გონებაშიც კი.

რა ნივთები წარმოიდგინე შენ და რა ხრიკებს იყენებ რომ სახლი მუდამ მწყობრში იყოს?

გაგვიზიარე შენი აზრები, და მოგვწერე თუ რის შესახებ დავწერო შემდეგში, 

___

მომავალ ბლოგამდე, 

ანა