განათებას და ფერებს უდიდესი მნიშვნელობა აქვთ სივრცის მოწყობისას. ორივე მათგანი უდიდეს ზეგავლენას ახდენს არამარტო გარემო პირობებზე, არამედ იქ მაცხოვრებელ ადამიანებზეც.

შეიძლება ვინმემ გაიფიქროს სახლის განათებას რა წესები უნდაო, მაგრამ თუ ამ ბლოგს ბოლომდე წაიკითხავთ, მიხვდებით, რომ წესების ცოდნა საჭიროც არის და სასარგებლოც, თან ნებისმიერ საკითხში.

დიდი ხანია ის დრო წარსულს ჩაბარდა, როცა ოთახის გასანათებლად ერთ ჭაღს იყენებდნენ. დღეისათვის სივრცეში სინათლის განაწილება ხელოვნებას დაემსგავსა. ამასთან, სანათების შერჩევის საკითხში ფუნქციონალურობას ენიჭება უპირატესობა.  როდესაც ხორციელდება რემონტი ან მშენებლობა, სივრცის განათების პროექტი ცალკე კეთდება, საბოლოოდ კი მისი ადაპტირება ხდება მოცემულ სივრცესთან დაკავშირებულ სხვა ნაწილების პროექტებთან და ასე იკვრება მთელიანი პაკეტი. განათების დიზაინზე მუშაობენ ამ სფეროს სპეციალისტები და ამ მხრივ ტრენდის სიახლეების, საინტერესო ინფორმაციის და რჩევების მოსმენა ნამდვილად სასარგებლო იქნება ყველასთვის. მსგავსი ინფორმაციის მიღებისთვის საკმარისია Google-ის საძიებო ველში სასურველ საკითხთან დაკავშირებული საკვანძო სიტყვების ჩაწერა და ზღვა მასალა თქვენს წინაშე გაჩნდება.

განათებას და ფერებს უდიდესი მნიშვნელობა აქვთ სივრცის მოწყობისას. ორივე მათგანი უდიდეს ზეგავლენას ახდენს არამარტო გარემო პირობებზე, არამედ იქ მაცხოვრებელ ადამიანებზეც. არქიტექტორები და ინტერიერის დიზაინერები დიდი ხანია შეთანხმდნენ იმაზე, რომ ბუნებრივი სინათლე უფრო ხშირად უნდა გამოიყენონ შენობების აგებისა და მისი გაფორმების დროს. დიდი თუ სახურავზე დამონტაჟებული ფანჯრებიდან, მზის შუქი დიდ როლს თამაშობს კომფორტული და სასიამოვნო საცხოვრებელი სივრცის შესაქმნელად. მის ასეთ მნიშვნელობას სხვადასხვა მიზეზები განაპირობებს: ბუნებრივი სინათლე, პირველ რიგში, მნიშვნელოვან როლს ასრულებს სივრცის აღქმაში. მზით განათებული ადგილები უფრო ფართო და ექსპანსიური ხასიათისაა, ვიდრე სივრცე, რომელსაც ხელოვნურად ვანათებთ. ამგვარ ინტერიერში ფერები უფრო ღრმაა და ბუნებრივი. ვიზუალურად კი სასიამოვნოდ აღქმება. ხელოვნური სინათლის დროს, ფერებს მკაფიოდ არაბუნებრივი სტილი აქვს, რაც მათ შარმსა და ვიზუალს აფუჭებს. ასევე კვლევებით დამტკიცდა, რომ ბუნებრივი განათება უფრო სწრაფად აჯანმრთელებს სნეულს, ამცირებს სტრესულ გარემოს და ზრდის პროდუქტიულობას. თუმცა გარემო იცვლება, სამყარო გაივსო შენობებით და დეველოპმენტი კონტექსტს უფრო და უფრო შორდება, ამიტომ თანამედროვე ქალაქს არ აქვს ფუფუნება, მასალა დახურული სივრცის გარეთ მოძებნოს. შესაბამისად, ხელოვნური განათება ქალაქურ სათავსებში მაინც ძირითადი განათების წყაროს წარმოადგენს.

სივრცის მოწყობის შესახებ ძალიან ბევრი შეიძლება ვისაუბროთ, ამ ბლოგში მინდა კონკრეტულად შევეხო საცხოვრებელი სახლის განათების წესებს, რომელთა გაცნობაც აუცილებლად დაგეხმარებათ თქვენი გარემოს გალამაზებაში.

მაშ ასე,

1. ლოკალური განათება - ძირითადი განათების წყარო.

ლოკალური სანათები დაგეხმარებათ მოახდინოთ ოთახის გონივრულად ზონირება. ასეთი სანათების აქტიური გამოყენება დაიწყო მას შემდეგ, რაც მოდური გახდა თავისუფალი და ლოფტის სტილის დიზაინი. ყველაზე დიდი შეცდომა ინტერიერის განათების პროექტში არის ესთეტიკური საკითხების ფუნქციონალურ საკითხებზე მაღლა დაყენება. მაგალითად - დიზაინერებს ხშირად ავიწყდებათ დამატებით ლოკალური სანათების გათვალისწინება საძინებელ ზონასთან, საკითხავ ადგილთან ან სასადილო მაგიდასთან.

2. მრავალდონიანი განათება – უპირობო must-have-ი!

ბინისა და სახლის ინტერიერი მოითხოვს სხვადასხვა დონის განათებას. მაგალითად: საძინებლისთვის გამოდგება რბილი და გაფანტული შუქის მქონე სანათი, მისაღებისა და აბაზანისთვის - მიმართული და ნათელი. სამზარეულოში მიზანშეწონილია სამუშაო ზედაპირის ლოკალური განათება. თუ ამის საშუალება არ არის,  იზრუნეთ სამუშაო ზონების ლოკალური სანათებით მოწყობაზე - გამოიყენეთ წერტილოვანი სანათები, რომელთა განთავსება რეკომენდირებულია სამზარეულოს გარნიტურში ან მის ქვედა პანელში ჩაშენებული ფორმით.

3. ფერადი სანათები 

ინტერიერის განათებაში მთავარ როლს ასრულებს ფერადი სანათები და მათ მიერ გამოყოფილი შუქის ტემპერატურა.

არსებობს სამი ძირითადი ფერი:

თბილი თეთრი ფერი (3300 კ-ზე ნაკლები)

ნატურალური თეთრი (3300–5000 კ)

ცივი თეთრი (5000 კ-ზე მეტი).

პირველი ტიპის გამოყენება მიზანშეწონილია მისაღებში, საძინებელსა და საბავშვო ოთახში. მეორე - შემოსასვლელსა და კაბინეტში, ხოლო მესამე სამზარეულოს სამუშაო ზონის გასანათებლად. 

4. ელექტროენერგიის ეკონომია – სანათების ეფექტურად მუშაობის საწინდარი

დადგენილი ნორმებიდან გამომდინარე, 1 მ2 ფართზე საჭიროა 10 ვტ-იანი ნათურის გათვლა. ამასთანავე, სანათების მწარმოებელთა შორის სანათის ეკონომიურობის უმთავრეს მახასიათებელად რჩება – ნათურის გამოსხივება, რაც გამოიხატება ლუმენი/ვატის თანაფარდობით.

ელექტროენერგიის დაზოგვაში დაგეხმარებათ ეკონომიური ნათურები. გაცილებით ეკონომიურია მაღალი წნევის მქონე განმმუხტავი ნათურები, თუმცა მათი ფასი თითქმის ხუთჯერ მეტია, ვიდრე ჩვეულებრივი ეკონომიური ნათურების. 

5. შუქის გონივრული გადანაწილება – უნაკლო ოთახი

შუქის გონივრული განაწილება საშუალებას იძლევა დაიფაროს სივრცის ნაკლოვანი მხარეები. შეკიდული და ჭერზე მიდგმული ტიპის სანათების გამოყენებისას ოთახის უფრო მაღალი ჩანს, აბაჟურიანი სანათები კი პირიქით, ოთახს ვიზუალურად დაბალს აჩენს. პატარა ოთახისთვის რეკომენდირებულია ნათელი შუქი და არეკვლის მქონე მასალის გამოყენება ჭერსა და იატაკზე - ასეთ დროს სივრცის მოცულობა უფრო დიდი ჩანს. წერტილოვანი განათება და დეკორის სხვადასხვა ელემენტებზე შუქდიოდური მინათება სივრცეს აპატარავებს, ამიტომ მათი გამოყენება

რეკომენდირებულია დიდი ფართობის მქონე ოთახებში.