ყოველდღიურობისთვის მოხდენილი და ჰარმონიული ე.წ. Total look-ი რომ შექმნათ, მარტივი და რთული სამოსის გამოყენებისას სხვადასხვა პროპორციის დაცვა არის საჭირო.

როგორც ქალების უმრავლესობას, მეც ძალიან მიყვარს ლამაზი, გამორჩეული სამოსი, ნივთები და აქსესუარები, რომლებიც დახვეწილი ქალური სილუეტის შექმნასა და ყოველდღიური რუტინული ცხოვრების გალამაზებაში გვეხმარება.

მიუხედავად იმისა, რომ ყოველდღიური რეჟიმიდან გამომდინარე უფრო თავისუფალი სტილის, მეტწილად შარვლებზე აწყობილი ლუქები მაქვს, ჩემს გარდერობში მაინც ვაერხებ ადგილი გამოვნახო ნაქარგიანი კაბებისთვის, ქვედაბოლოებისთვის, აბრეშუმის შარფებისთვის, კლასიკური პიჯაკების, ჩანთებისა და ფეხსაცმელებისთვის. განსაკუთრებით მიყვარს ჩანთები და აქსესუარები, შემიძლია ბოლო თეთრი გადავიხადო მათ შეძენაში... მაღაზიების ფართე ვიტრაჟებს მიღმა გამოფენილი ნივთები ყოველ დანახვაზე ერთიანად მინდა რომ სახლში წავიღო...

თუმცა, აქვე უნდა აღვნიშნოთ, რომ თვალის მომჭრელი ბისერებით, ნაქარგებით, სხვადასხვა ფერის ტყავითა და თვლებით დამზადებული ნივთების გარდა არსებობს ისეთი ნივთებიც, რომლებიც არანაკლებ მოხდენილად შეიძლება გვქონდეს სხეულზე, გაცილებით მნიშნელოვანიც კი იყოს ქალის გარდერობისთვის, მაგრამ ისე გამოიყურება ერთი შეხედვით, რომ აღფრთოვანებას ნამდვილად არ იწვევს...

ერთ-ერთი ასეთი სამოსი არის მარტივი ბლუზა ან პერანგი, მონოტონური, კარგი ხარისხის და მარტივად აჭრილი - მის გარეშე ყველა ის გადაპრანჭული ტანსაცმელი და ფეხსაცმელი, რაც გარდერობში გვაქვს, უბრალოდ არაფერს წარმოადგენს.

ამაში რომ დარწმუნდეთ მარტივია - სცადეთ სადა, მარტივი ბლუზის ან პერანგის გარეშე თქვენი ტანსაცმლისგან მოხდენილი ლუქების აწყობა, რთულია და თან არც ისე მარტივია არა?

ახლა ზედატანის ადგილი სადა, ერთფეროვან და მარტივად აჭრილ ბლუზას ან პერანგს დაუთმეთ და ისე სცადეთ - მოგწონთ? დარწმუნებული ვარ ძალიან მოგწონთ! თუმცა ეს არ ნიშნავს, რომ გარდერობში რაც გიკიდიათ არაფერი გამოდგება ან გადასაყრელია, არა, პირიქით, ყველაფერი ძალიან კარგია ცალკე აღებული და ხდება ისეც, რომ მათგან აწყობილი ლუქიც ჰარმონიულად გამოიყურება, თუმცა ის შეიძლება იმდენად სადღესასწაულო და გადაპრანჭული გამოვიდეს, რომ კაფეში მეგობრებთან შეხვედრაზე და თაყვანისმცემელთან და მეგობარ ბიჭთან ერთად ფილმის სანახავად ასე წასვლას ვერ შეძლებთ. დღესასწაულებზე, საახალწლო თუ სხვა წვეულებებზე ისინი ნამდვილად გამოგადგებათ, თუმცა ასეთი დღეები იშვიათია - დგება „ჭეშმარიტების“ მომენტი: გარდერობი სავსეა ფერადი, ბრჭყვიალა, ნაქარგებიანი და მაქმანებიანი სამოსით, მათი ჩაცმა და ტარება კი ფაქტიურად შეუძლებელია...

სწორედ ამიტომ, სადა ზედატანთან კომბინაციაში აწყობილი ლუქები ყოველდღიურობისთვის საუკეთესო ვარიანტია!

გადავიდეთ ყველაზე საინტერესო ნაწილზე და საუბარი განვაგრძოთ იმის შესახებ, თუ როგორ შეგიძლიათ შექმნათ ყოველდღიური ლუქი ნებისმიერი სამოსისგან, რომელიც თქვენს გარდერობს ამშვენებს.

ყოველდღიურობისთვის მოხდენილი და ჰარმონიული ე.წ. Total look-ი რომ შექმნათ, მარტივი და რთული სამოსის გამოყენებისას სხვადასხვა პროპორციის დაცვა არის საჭირო. რაც უფრო ყოველდღიური ანუ casual სტილის ლუქის შექმნას გადაწყვეტთ, მით უფრო მეტად უნდა გამოიყენოთ მარტივი, საბაზისო სამოსი და მით უფრო ნაკლებად გადაპრანჭული სტილის ტანსაცმელი და დამატებითი ნივთები.

ასეთი ეფექტის მისაღებად გამოგადგებათ სწორედ ის მარტივი, საბაზისო, მონოტონური, კარგი ხარისხის ნაჭრით შეკერილი და მარტივად აჭრილი ბლუზა ან პერანგი, რომელზეც დასაწყისშივე ვსაუბრობდი.

მნიშვნელოვანია გახსოვდეთ:

1. ზედატანი უნდა იყოს საბაზისო - ანუ მონოტონური, მარტივად აჭრილი, დეკორის, სამხრეების, ნაკეცების და მსგავსი დეტალების გარეშე!

2. სავალდებულო არ არის ასეთი ზედატანი იყოს მხოლოდ თეთრი, შეგიძლიათ გამოიყენოთ ბეჟი, ნაღებისფერი, სპილოს ძვლის ფერი, ერთი სიტყვით მონოტონური ფერთა გამიდან ნებისმიერი, ოღონდ ფერი არ უნდა იყოს მკვეთრი.

 

3. კიდევ ერთი მნიშვნელოვანი მომენტი: ზედატანი არ უნდა იყოს მომჯდარი, თავისუფლად უნდა გქონდეთ.

4. თუ ასეთი სტილის ბლუზა ან პერანგი გამჭვირვალეა, შეგიძლიათ მის შიგნით ჩაიცვათ მაისური წვრილი სამხრეებით, რომელიც აუცილებლად უნდა იყოს თხელი, ჰაეროვანი და სადა, ზედმეტი მაქმანების გარეშე.

 

5. ზედატანის სიგრძე უნდა იყოს თეძოების შუა ნაწილამდე, შეიძლება ოდნავ გრძელიც, წინააღმდეგ შემთხვევაში დაიტანჯებით მისი ჩაკვრა-გასწორებით ყოველი დაჯდომა-ადგომის შემდეგ. ასეთი მანიპულაციები კი საერთოდ არ შეეფერება ქალს, მითუმეტეს ისეთს, რომელიც ცდილობს მოხდენილად გამოიყურებოდეს. ხომ მეთანხმებით?

 

უნდა აღვნიშნო ის მომენტიც, რომ ქალების უმრავლესობა საბაზისო ბლუზების და პერანგების დანიშნულებას მხოლოდ მათ ოფისში სიარულისას გამოყენებაში ხედავს, მაგრამ საბაზისო ზედატანთან შესაფერისი სამოსის სია ფაქტიურად შეუზღუდავია!

თუ თქვენ მოგწონთ ლუქში „მსუბუქი უწესრიგობა“, მაშინ შეგიძლიათ საბაზისო ბლუზა ან პერანტი ატაროთ ჯინსის ნაჭრისგან შეკერილი სამოსის გახეხილ ან დახეულ მოდელებთან. მაგრამ გაითვალისწინეთ, ასეთი სტილის ლუქის შექმნას თუ გადაწყვეტთ, „უწესრიგო“ თქვენს ლუქში შეიძლება იყოს მხოლოდ ერთი-ორი დეტალი, მაგალითად არეულ სტილში შეკრული თმა დაუმატოთ უკვე შერჩეულ, დახეულ ჯინსებს, ლუქის დანარჩენი შემადგენელი ნაწილი იდეალურად მოწესრგიებული უნდა გქონდეთ!

საბაზისო, მარტივად აჭრილი ზედატანი იდეალური კომპანიონია ნებისმიერი ქვედაბოლოსთვის! ბევრი ქალი რატომღაც ერიდება ტყავის ქვედაბოლოს ჩაცმას იმ მიზეზით, რომ ეშინია ვულგალურად ან გადაჭარებებულად არ გამოჩნდეს ამ ფორმაში, მაგრამ ფოტოს თუ დააკვირდებით, დამეთანხმებით კიდეც, რომ საბაზისო ზედატანი სრულად ანეიტრალებს ლუქს და ვერავინ იტყვის, რომ ქალი ვულგალურად გამოიყურება, მთლიანობაში კი ფორმა ძალიან მოხდენილი და ზომიერად სექსუალური გამოდის.

ნეიტრალური და უნივერსალური ზედატანი მარტივად ადაპტირდება ნებისმიერ სტილსა და ლუქთან, დაწყებული რომანტიკული სტილიდან, დამთავრებული დრამატული, business-casual და safari style-ით! ერთფეროვანი ზედატანი ფაქტიურად სუფთა ფურცელი და წარმატებული ექსპერიმენტების უნიკალური საშუალებაა ლუქის შექმნაში, ის შესანიშნავად გამოიყურება დაპრინტულ სამოსთან , ავსებს და აწონასწორებს მთლიან ლუქს! ფოტოებს თუ დააკვირდებით ამაში თავადაც დარწმუნდებით.

მოდი ცოტა გავართულოთ ამოცანა, ანუ ვგულისხმობ იმას, რომ ამგვარი ლუქსი აწყობისას სავალდებულო არ არის მხოლოდ საბაზისო ზედატანს ჰქონდეს მთავარი როლი. მასთან ერთად შეგიძლიათ შექმნათ მრავალფენიანი და ძალიან მოხდენილი კომპლექტები.

და ბოლოს, რამოდენიმე წინადადებით შევეხები საკითხს, რომელიც ასევე მნიშვნელოვანია საბაზისო ზედატანის გამოყენებით მოხდენილი, მოდური და უბრალოდ ლამაზი ლუქის შესაქმნელად, ანუ

როგორ არ უნდა ჩავიცვათ საბაზისო, მარტივი ზედატანი

საბაზისო ზედატანის ჩაცმა ე.წ. კაბა „ფუტლიარი“-ს კომბინაციაში ძალიან მიუღებელია და სასწავლო დაწესებულების უნიფორმასავით გამოიყურება. თუ არ გინდათ თქვენც ასე გამოიყურებოდეთ, მაშინ უმჯობესია მოერიდოთ მსგავსი კომბინაციით ლუქის აწყობას.

თუმცა ზოგჯერ ასეთი შეხამების წარმატებული ვარიანტებიც შეიძლება შეგხვდეს, ამაზე ერთმნიშვნელოვნად ვერ ვიკამათებთ...

ასევე არ არის სასურველი საბაზისო ზედატანის ჩაცმა კლასიკური პიჯაკების, ნაქსოვი ჯემპრებისა და ჟილეტების ქვეშ - ეს ლუქი არც ისე მოხდენილად გამოიყურება და თან ძალიან გაცვეთილია... თუ მაინცადამაინც ასე გინდათ ჩაცმა, მაშინ ეცადეთ მისი გამოცოცხლება მოდური აქსესუარებით, ფაქტურების არასტანდარტული შეხამებით, გამოიყენეთ პრინტი, ქვედა სამოსად შეგიძლიათ გამოიყენოთ არა კლასიკური შავი შარვალი, არამედ ტყავის ლეგინსები და ა.შ.

ქვემოთ ფოტოებზე წარმოდგენილი ლუქიც რომ დიდი ხანია უკვე გაცვდა და აღფრთოვანებას აღარ იწვევს, ამაშიც დამეთანხმებით ალბათ...

იმედი მაქვს ჩემი რჩევები სასარგებლო იყო თქვენთვის ქალბატონებო.

ცხოვრება მშვენიერია, ამიტომ იყავით მოხდენილი და ლამაზები ყველაზე მარტივი და ყოველდღიური სამოსის დახმარებით!

გისურვებთ ულევ ბედნიერებას!